Соединетите Држави во понеделникот рекоа дека има знаци дека Русија и Иран ја прошируваат својата воена соработка.
Портпаролот на Стејт департментот, Ведант Пател, им рече на новинарите дека Иран „останува главен воен поддржувач на Русија, а Иран веќе и дал на Русија артилерија и тенкови за употреба во Украина“.
Пател рече дека од август, „Иран ѝ дал на Русија повеќе од 400 беспилотни летала, првенствено од сортата Шахед, а Русија ги потрошила повеќето од овие беспилотни летала користејќи ги за да ја таргетира украинската критична инфраструктура во Украина“.
„Продлабочувањето на оваа соработка е закана и опасност не само за Украина; тоа е закана и опасност за соседите на Русија, соседите на Иран и пошироко за меѓународната заедница“, им рече Пател на новинарите.
Портпаролот на Советот за национална безбедност на Белата куќа, Џон Кирби, за време на брифингот во понеделникот за новинарите изјави дека односите меѓу Русија и Иран и дозволуваат на Русија да убива повеќе луѓе во Украина, истовремено овозможувајќи Иран да складира воен хардвер и да претставува поголема закана за своите соседи.
Некои информации за овој извештај дојдоа од Ројтерс.