Советот за безбедност на ОН денеска би можел да гласа за резолуција со која се повикува на хуманитарен прекин на огнот во Појасот Газа, додека американскиот секретар за одбрана Лојд Остин го посети Израел за да разговара за заштитата на цивилите и за планирањето на Израел за следната фаза од неговата војна против Хамас.
Остин на X, порано познат како Твитер, по неговото пристигнување во Израел рече дека ќе ги искористи и неговите разговори со израелскиот премиер Бенјамин Нетанјаху и министерот за одбрана Јоав Галант за „да ја повтори железната посветеност на Америка кон Израел“ и да овозможи проток на помош во Газа.
Нацрт-резолуцијата на Советот за безбедност, која ја видоа повеќе новински агенции, повикува на „итен и одржлив прекин на непријателствата за да се овозможи безбеден и непречен хуманитарен пристап“.
Камиони со помош стигнаа до Газа, а Израел минатата недела отвори уште еден премин за испораки, но хуманитарната агенција на ОН рече дека 121 камион што влегоа во саботата беа далеку под 500 дневно што носеа помош во Газа пред војната.
Резолуцијата на Советот за безбедност претходно овој месец со која се повикува на хуманитарен прекин на огнот не успеа бидејќи Соединетите држави го искористија своето вето за да ја запрат мерката. САД и Израел тврдат дека прекинот на огнот ќе му користи на Хамас.
Генералното собрание на ОН со големо мнозинство поддржа слична резолуција набргу потоа, но неговите резолуции се необврзувачки.
За време на посетата на Израел во неделата, француската министерка за надворешни работи Катрин Колона повика на „итно примирје“ со цел да се ослободат повеќе заложници, да се донесат поголеми количини помош во Газа и да се движи кон „почеток на политичко решение“.
Британскиот министер за надворешни работи Дејвид Камерон и неговата германска колешка, Аналена Баербок, исто така повикаа на „одржлив прекин на огнот“ во Газа во заедничката статија објавена во британскиот „Сандеј тајмс“.
„Израел нема да победи во оваа војна ако неговите операции ја уништат перспективата за мирен соживот со Палестинците“, напишаа тие.
Израел вети дека ќе го уништи Хамас, кој управува со Газа, откако милитантната група испрати борци во Израел на 7 октомври, убивајќи околу 1.200 луѓе, главно цивили. Хамас, кој беше прогласен за терористичка организација од страна на САД, Велика Британија, ЕУ и други, исто така зеде околу 240 луѓе како заложници. Повеќе од 100 од заложниците остануваат во Газа.
Во израелската офанзива загинаа повеќе од 18.700 луѓе во Газа, според Министерството за здравство на Хамас.
Агенцијата на ОН за палестински бегалци (УНРВА) вели дека конфликтот принудил околу 85 отсто од населението во Газа да ги напушти своите домови, при што многу од нив се обидуваат да најдат безбедно место за престој во засолништата на ОН во јужниот дел на Газа, кои се неколку пати повеќе од нивниот капацитет.
УНРВА соопшти дека 135 нејзини членови на персоналот се убиени, а 115 нејзини инсталации се оштетени од почетокот на конфликтот на почетокот на октомври.
Некои информации за оваа содржина дојдоа од Асошиетед прес, агенцијата Франс прес и Ројтерс.