Американците со азиско потекло се најбрзо растечката група на граѓани со право на глас во Соединетите држави, според Истражувачкиот центар Пју. Но, тие не се униформни во нивната политика.
Кристин Чен е извршна директорка на непартиската група на американски гласачи од азиско-пацифичко потекло.
„Вообичаено Американците со индиско и јапонско потекло се најголеми поддржувачи на демократите, а Американците со виетнамско потекло се всушност големи поддржувачи на републиканците. Американците со кинеско потекло се префрлија од демократи, нивното најголемо идентификување, на неутрални. Она што се укажува е дека нема доволно ангажман на политичките партии и кампањите за да можат да ги едуцираат за прашањата за кои всушност се залагаат во нивната кампања", вели Чен.
Мишел Стил е родена во Јужна Кореја, а израсната во Јапонија. Републиканската конгресменка претставува дел од округот Оринџ во Калифорнија и има содржини на виетнамски јазик на нејзината веб-страница бидејќи таму живее една од најголемите виетнамски американски заедници во Соединетите држави.
„За Американците со виетнамско потекло имам пет виетнамски фустани и ја носам нивната облека. Кога одам во филипинската заедница, јас носам „сари“. Ги правам сите овие работи, а тие знаат дека си еден од нив“, посочува Стил.
Стил вели дека таа и нејзините поддржувачи тропнале на повеќе од 190.000 врати за време на нејзината реизборна кампања пред две години.
„Тоа е начинот на кој допирате до американските заедници од азиско потекло. Во мојот округ зборуваме седум различни јазици, но сите го кажуваат истото”, додава Стил.
Кампањата од врата до врата е особено важна за азиските гласачи, од кои повеќе од 70 отсто користеле гласачки ливчиња по пошта и предвремено гласање во 2020 година, според Чен.
„Кога имате гласачко ливче доставено преку пошта, можете да седнете на масата во кујната, да разговарате со вашето семејство и пријатели за проблемите, за кандидатите, и можете да добиете помош за превод и да не бидете под притисок за кого ќе гласате”, смета Чен.
Важноста што републиканците им ја даваат на американските гласачи од азиско потекло се однесува на Грејс Менг, демократска американска конгресменка која претставува област во округот Квинс во Њујорк.
„Мислам дека во последно време има зголемено чувство на итност затоа што видовме дека Републиканската партија, некои од нивните кандидати, се претставуваат на повеќе јазици. Им рековме на нашите демократски лидери и кандидати дека не можеме повеќе да чекаме, затоа што другата страна напредува. Ние треба да бидеме сигурни дека го правиме тој терен за луѓето да знаат која партија навистина стои зад нив и ги претставува нивните вредности“, вели Менг.
Сандра Чои е директорка за граѓанско учество на Центарот за акција во заедницата Минквон.
„Работиме на тоа од година во година овде, градејќи политичка моќ за имигрантите, за американски имигранти од азиско потекло, за работничките заедници - но особено за изборите во 2024 година. Знаеме дека ова е моментот навистина да ги мобилизираме нашите заедници, да ја разбереме нивната моќ во градењето на нешто поголемо, подобра иднина за сите нас оваа година”, додава Чои.
Проекциите на истражувачкиот центар Пју велат дека 15 милиони Американци со азиско потекло ќе имаат право да гласаат овој ноември. Повеќе од половина од нив живеат во само пет држави: Калифорнија, Њујорк, Тексас, Хаваи и Њу Џерси.