Роберт Кард, осомничениот за убиството на 18 лица и ранувањето на 13 во американската сојузна држава Мејн, е пронајден мртов, 48 часа откако отворил оган во бар и куглана во градот Левистон.
Гувернерката на Мејн Џенет Милс потврди дека телото на Роберт Кард е пронајдено во близина на градот Лисабон.
„Долгата потрага е завршена, полицијата ќе ја продолжи истрагата за да се утврди вистината за тоа што се случило“, рече Милс, додавајќи дека „народот на Мејн може да здивне и дека таа го известила американскиот претседател Џо Бајден и членовите на Конгресот“.
Шефот на полицијата во Левистон, Дејв Санпиер, ја потврди смртта на Кард и рече дека тоа е „најдобрата вест на која заедницата можеше да се надева“.
Надлежните не сакаа да зборуваат за деталите за тоа како почина Кард, ниту како се одвива потрагата по него, бидејќи „сакаа најпрво да разговараат со семејствата на жртвите, но и со семејството на осомничениот кој добро соработувал со властите“.
Асошиетед прес претходно објави дека Роберт Кард, по кого трагаа стотици полицајци, извршил самоубиство. Телото на Кардо е пронајдено во шума во близина на градот Лисабон, десет километри оддалечено од местото на нападот, објави Си-Ен-Ен, исто така, повикувајќи се на полициски извори. Телото е пронајдено во близина на центарот за рециклирање каде што неодамна беше отпуштен Кард.
Државниот патолог соопшти дека сите жртви се идентификувани - меѓу нив има 16 мажи и две жени. Најстарата жртва има 76 години, а најмладата 14. Седум жртви се убиени во куглана, а осум во блиска кафеана. Тројца починале на пат кон болница.
Медиумите претходно ги објавија имињата на некои од жртвите, а властите се уште не го сториле тоа.
Меѓу жртвите на нападот беа Бил Јанг и неговиот 14-годишен син Арон, кои беа убиени во кугланата, изјави за Ројтерс братот на Бил, Роб.
Брајан Мекфарлејн (40), член на општинската група за глуви, исто така е убиен додека учествувал на турнир во ресторан каде што напаѓачот отворил оган, изјави за Си-Ен-Ен неговата сестра Кери Брукс.
Потрагата по Кард
Полицајците ги пребараа шумите, имотот на семејството и локалната река, користејќи нуркачи и сонари. Официјалните лица ги повикаа десетици илјади жители да не излегуваат надвор, само за да ја укинат наредбата за престој дома подоцна во петокот. Полицијата во четвртокот вечерта го пребара соседниот град Баудон, каде што живееше Кард.
Мајк Сосек, комесар на секретарот за јавна безбедност на Мејн, на прес-конференција во петокот рече дека за време на претресот била пронајдена писмена порака, но одби да каже што содржи или кој ја напишал. Агенцијата Асошиетед прес јавува, повикувајќи се на полициски извори, дека се работи за проштално писмо што Кард му го оставила на својот син.
Левистон, некогашен центар на текстилната индустрија со население од 38.000 жители, и околните градови се главно затворени од нападот во средата вечерта, додека стотици полицајци трагаа по осомничениот. Факултетите и училиштата ја откажаа наставата втор ден по ред.
Речиси немаше автомобили на патиштата, а многу продавници во Левистон беа затворени. Вооружени агенти ја обезбедувале болницата во која се сместени многу од жртвите на престрелката.
„Ја молам заедницата да биде што е можно потрпелива“, рече началникот на полицијата во Левистон, Дејвид Сент Пјер на прес-конференција.
Бројот на престрелки во Америка во кои се застрелани четири или повеќе луѓе се очекува да достигне 679 во 2023 година, од 647 минатата година, според податоците од Архивата за огнено насилство.
Бројот на луѓе убиени во нападот во средата е блиску до годишната стапка на убиства во Мејн, која се движи од 16 до 29 од 2012 година, покажуваат податоците на државната полиција.
Поради нападот, демократскиот конгресмен Џаред Голден од Мејн им изјави на новинарите дека повеќе нема да се противи на забраната за полуавтоматско оружје.
„Го повикувам Конгресот да донесе забрана за автоматско оружје како она што го користеше масовниот убиец во мојот роден град“, рече Голден на прес-конференција.
Сепак, Конгресот не донесе построги закони за оружје, дури и по претходните трагедии како масакрот во основното училиште Сенди Хук во 2012 година во Њутн, кога беа убиени 20 ученици од основно училиште и шест возрасни. Во пресудата од 2022 година, Врховниот суд исто така го отежна носењето на построги закони.
Највисокиот суд на нацијата пресуди дека поединците имаат уставно право да носат оружје на јавно место и дека членовите на Конгресот можат само да донесат закони за контрола на оружјето слични на оние што постоеле во Америка во 18 век.