СКОПЈЕ – На денешното рочиште во судскиот процес за убиството на четиринаесетгодишната Вања Ѓорчевска и седумдесет и четиригодишниот Панче Жежовски, Обвинителството ги презентираше материјалните докази собрани во истрагата кои покажуваат како биле извршени двете ликвидации. Недолжните жртви претрпеле сериозно и тешко психичко страдање во последните моменти од животот а сите обвинети биле пресметливи во моментот на извршување на убиствата.
Доказите ги презентираше обвинителката Жаклина Крстевска Јосифовска.
На колената и чевлите на четиринаесетгодишната Вања Ѓорчевска имало траги од кал што укажува дека била на влажен терен и не ја исклучува можноста дека клечела пред да биде ликвидирана. Пукано е во неа од непосредна близина а убиецот стоел зад неа и надесно. При обдукцијата, судиските вештаци го наоѓаат куршумот во телото на Ѓорчевска. На самолепливата лента која и била залепена на устата за да не може да вика се најдени ДНК траги и на обвинетиот Велибор Манев.
Жежовски исто така е убиен со еден истрел во главата и исто така со куршум со калибар од 9 милиметри. Во близина на местото каде ќе биде убиен и закопан Жежовски истражителите ја нашле чаурата од испуканиот куршум - произведен од „Сувенир” во 2002 година.
Обвинителката Крстевска Јосифовска кажа дека психијатриското вештачење на обвинетите потврдиле дека биле пресметливи.
Презентирањето на доказите ги вознемири присутните во судницата а најмногу реакции имаше од обвинетиот Палевски.
Откако ќе заврши презентирањето на материјалните докази на Обвинителство, следува сослушување на сведоци на одбраната.
На обвинителната клупа се Љупчо Палевски – Палчо, Велибор Манев, Влатко Кешишов, Боре Видевски и Александар Ѓорчевски, таткото на Вања, кој се товари за помагање кои се изјснија за невини на почетокот на судскиот процес.