Вицепремиерката за европски прашања Теута Арифи, присуствуваше на конференција во Стејт департментот за заживување на проектот за зголемување на бројот на жени во јавниот сектор на локално, национално и меѓународно ниво. За впечатоците од состанокот меѓу 40 учесници од 37 земји во светот, вели:
„Женските права се човекови права. Ангажирањето за поголемо присуство на жените не само во политичкиот и јавниот живот туку и во целиот процес на градење на општеството е многу значајно, затоа што на процесите им се дава еден нов квалитет кој очигледно недостига кога жените не се дел од процесот“.
Македонија за отворени односи со САД
Таа е прва жена-Албанка која станала парламентарка во Македонија. Горда е што Македонија е една од земјите која предничи во застапеност на жените на изборни функции и се залага за промовирање на еднаквоста на жените и мажите во сите сфери на општеството.
Таа во Вашингтон се сретнала со официјални американски лица, на кои им го пренела очекувањето на Македонија.
Македонија за отворени односи со САД
„Нашето инсистирање е следниот самит на НАТО да биде успешен и ние да успееме да станеме полноправна членка. Сметам дека ние како земја треба да инвестираме труд, време и волја во градење силни и отворени односи со администрацијата во САД, затоа што мислам дека се работи за еден битен стратешки партнер не само за Македонија, туку и на регионот, кој помагал во овие 20-годишни процеси на градење мир и демократија во регионот“, вели Арифи.
Нејзиниот впечаток е дека во САД позитивно се гледа на фактот што реакциите во Македонија по одлуката на судот во Хаг не се еуфористички, ниту триумфалистички, и тоа се цени како политичка зрелост на политичките актери во Република Македонија. Вицепремиерката Арифи рече дека американската администрација останува заинтересирана спорот со името да се надмине што е можно побрзо.