Кинескиот увоз на руска нафта минатиот месец го достигна највисокото ниво од инвазијата на Москва на Украина во февруари 2022 година, покажаа во вторникот податоците на царината на Пекинг.
Кина увезла 9,71 милиони тони нафта од Русија во мај, покажаа деталните царински податоци, што е повеќе од 5,4 милиони тони во февруари 2022 година и 6,3 милиони следниот месец.
Бројките покажуваат дека увозот на руска сурова нафта од Кина по инвазијата на Москва на Украина е речиси двојно зголемен.
Тие се во согласност со трговските бројки објавени овој месец кои покажаа дека трговијата на Кина со Русија се искачи на нивоа што не се забележани од февруари 2022 година.
Трговската размена меѓу двете земји минатиот месец изнесуваше 20,5 милијарди долари, покажаа податоците од Пекинг, а кинескиот увоз од Русија во вредност од 11,3 милијарди долари.
Кина е најголемиот трговски партнер на Русија, а трговската размена меѓу нив достигна рекордни 190 милијарди долари минатата година, покажуваат податоците на кинеската царина.
За време на самитот во март, кинескиот претседател Шји Џинпинг и рускиот лидер Владимир Путин ветија дека ќе ја зголемат трговијата до 200 милијарди долари во 2023 година, бидејќи го поздравија нивното партнерство „без ограничувања“.
И испораките на руската енергија во Кина ќе пораснат за 40 отсто оваа година, рече минатиот месец вицепремиерот Александар Новак.
Пекинг вели дека е неутрална страна во војната во Украина, но е критикуван од западните земји поради тоа што одбива да ја осуди Москва и поради нејзиното блиско стратешко партнерство со Русија.
Извор: Агенција Франс прес