Сирените за воздушна одбрана се огласија во петокот во главниот град на Украина, Киев, додека делегација на африкански шефови на држави се состана со владините лидери со надеж дека ќе посредува за мировен договор меѓу Украина и Русија.
Градоначалникот на Киев, Виталиј Кличко објави на социјалните мрежи дека имало експлозија во централниот кварт Подил.
„Проектилите сè уште летаат кон Киев“, рече тој на социјалната медиумска платформа Телеграм.
Јужноафриканскиот претседател Кирил Рамафоса е дел од африканската мировна делегација која треба да се сретне со украинскиот претседател Володимир Зеленски, што е првиот чекор во неговата мисија да посредува во мировниот договор меѓу Киев и Москва.
Другите членови на делегацијата се сенегалскиот претседател Меки Сал, претседателот на Замбија Хакаинде Хичилема и претседателот на Коморите Азали Асумани, кој моментално ја предводи Африканската унија.
Тројца други претседатели требаше да учествуваат во мировната мисија, но наместо тоа, тие ќе испратат свои претставници од Република Конго, Египет и Уганда.
Групата се очекува да се сретне со Зеленски во петок, а потоа да отпатува за Русија за да се сретне со рускиот претседател Владимир Путин.
Ројтерс објави дека видел нацрт на мировните предлози и преговори што ги подготви африканската мировна мисија, кои вклучуваат повлекување на руските трупи и суспендирање на спроведувањето на налогот за апсење на Меѓународниот кривичен суд против Путин.
Генералниот секретар на НАТО, Јенс Столтенберг, во четвртокот изјави дека војната во Украина ја покажува потребата да се застане со Украина и да продолжи да се дава поддршка.
Столтенберг им рече на новинарите при пристигнувањето во седиштето на НАТО дека по започнувањето на долгоочекуваната контраофанзива, Украина постигнала придобивки и ја ослободила окупираната земја од руските сили за време на жестоките борби.
Подоцна, американскиот генерал Марк Мили, претседател на Здружени началници на Генералштабот, ја повтори таа оценка, им рече на новинарите во Брисел дека Украина „постигнува напредок“, истовремено признавајќи: „Тоа е многу тешка борба. Тоа е многу крвава борба“.
Мили рече дека моралот на руските војници „не е висок“ и дека раководството на московските трупи недостасува.
Столтенберг рече дека напредокот на Киев „се должи на храброста, смелоста, вештините на украинските војници, но исто така истакнува и покажува дека поддршката што сојузниците на НАТО и ја даваат на Украина многу месеци всушност прави разлика на бојното поле.”
Тој истакна дека колку Украина е поуспешна во оваа фаза, толку поголем притисок ќе изврши врз рускиот претседател Владимир Путин да дојде на преговарачка маса и да и даде на Украина посилна рака во мировните преговори.
Столтенберг рече дека ако сојузниците сакаат траен мир во Украина, тие мора да продолжат со воена поддршка на украинските сили.
Исто така во четвртокот, пукотниците накратко го запреа конвојот на ОН додека се враќаше на територијата што ја држеше Украина по неговата посета на нуклеарната централа Запорожје, контролирана од Русија.
Конвојот, предводен од Рафаел Гроси, генерален директор на Меѓународната агенција за атомска енергија, не е во непосредна опасност и никој не е повреден, изјави за Ројтерс портпаролот на МААЕ.
Рускиот државен медиум Тасс го цитираше Ренат Карчаа, советник на шефот на компанијата Росенергоатом, кој ја обвини Украина дека отворила оган врз конвојот на ОН. Тасс не обезбеди докази за да го поткрепи тврдењето.
Конвојот безбедно се врати на територијата под контрола на Украина.
Контакт групата за Украина, предводена од САД, ја одржа својата последна седница во четвртокот во Брисел, на која разговараше за воената помош за Украина пред состанокот на шефовите на одбраната на НАТО.
Американскиот секретар за одбрана Лојд Остин на отворањето на состанокот рече дека борбата во Украина „е маратон, а не спринт“.
„Ние ќе продолжиме да ги и даваме на Украина итните способности што и се потребни за да го исполни овој момент, како и она што и е потребно за да се одржи долгорочно безбедна од руска агресија“, рече Остин.
Тој ја истакна потребата да се обезбедат украинските сили со системи за противвоздушна одбрана кои се клучни за заштита на украинските цивили од руските воздушни напади.
„Империјалните амбиции на Кремљ му нанесоа незамисливо страдање на украинскиот народ, но сепак Украинците продолжуваат да не инспирираат со нивната издржливост, нивната храброст и нивната непоколеблива посветеност да ја задржат својата земја слободна и безбедна“, рече Остин.
По состанокот, Остин рече: „Ова ќе продолжи да биде тешка борба, како што очекувавме. Ние продолжуваме да притискаме напред за она што и треба на Украина“.
Норвешка и Данска најавија заеднички напори да обезбедат илјадници артилериски гранати за Украина.
„Украина има итна потреба од артилериска муниција. Затоа, решивме да ги здружиме силите со Данска за нова донација, за Украина да ја добие муницијата што е можно побрзо“, изјави министерот за одбрана на Норвешка, Бјорн Арилд Грам.
Украинската војска во четвртокот соопшти дека пресретнала руска крстосувачка ракета, како и 20 експлозивни беспилотни летала лансирани од Русија.
Во Крим под руска контрола, руските власти соопштија дека нивната страна соборила девет украински беспилотни летала.
Некои информации за оваа содржина дојдоа од Асошиетед прес, агенцијата Франс прес и Ројтерс.