Кабинетот на израелскиот премиер Бенјамин Нетанјаху соопшти дека израелската војска „на воениот кабинет му претставила план за евакуација на населението од областите на борбите во Појасот Газа и претстојниот оперативен план“.
Изјавата уследи по ветувањето на Нетанјаху дека ќе продолжи со плановите за копнена инвазија во градот Рафа во јужниот дел на Газа, каде што повеќе од половина од населението во Газа побара засолниште од војната.
Во соопштението не се дадени никакви детали за тоа каде ќе можат да одат Палестинците.
Рафа се наоѓа долж границата меѓу Појасот Газа и Египет. Областите на север се уништени од четиримесечна војна, а Египет соопшти дека нема да ги отвори своите граници.
Обединетите нации изразија загриженост за каков било план за преместување на цивилното население во Газа и за израелските планови да започне офанзива во областа населена со луѓе на кои веќе им е потребна хуманитарна помош.
Генералниот секретар на ОН, Антонио Гутереш изјави дека хуманитарната помош во Газа останува „целосно недоволна“ и дека израелската офанзива во Рафа во голема мера ќе им наштети на тие напори.
„Сеопфатна израелска офанзива врз градот не само што би била застрашувачка за повеќе од милион палестински цивили кои се засолнуваат таму, туку ќе ја стави последната шајка во ковчегот на нашите програми за помош“, рече Гутереш.
Израел објави дека убила десетици милитанти во областа Зејтун, источно од градот Газа во северниот дел на Појасот Газа, како и во Кан Јунис во јужна Газа.
Израелската војска, исто така, соопшти дека изведува напади „длабоко во Либан“ насочени кон милитантната група Хезболах. Безбедносни извори соопштија дека нападите се случиле во близина на градот Баалбек.
Израел и Хезболах, сојузник на Хамас, разменуваа оган преку нивната граница за време на војната, што помогна да се разгорат стравувањата од проширување на конфликтот.
Претходно, Израел рече дека проектил пресретнал израелско беспилотно летало додека оперирало над Либан.
Министерството за здравство во Газа, управувано од Хамас, соопшти дека најмалку 90 луѓе биле убиени во текот на изминатиот ден, со што вкупниот број од израелската воена операција достигна најмалку 29.782 убиени и 70.043 повредени. Израелската војска соопшти дека убила 12.000 борци на Хамас. Повеќето од убиените се жени и деца.
Израел ја започна својата воена офанзива за уништување на Хамас по терористичкиот напад на Хамас врз Израел на 7 октомври, според израелските податоци, во кои загинаа 1.200 луѓе и доведе до апсење на околу 250 заложници.
Околу 100 заложници беа ослободени за време на еднонеделниот прекин на огнот во ноември. Израелската војска вели дека верува дека околу 30 заложници кои ги држел Хамас потоа умреле или биле убиени во Газа.
Палестинскиот премиер Мохамед Штаје во понеделникот ја објави својата оставка.
„Следната фаза и нејзините предизвици бараат нови владини и политички аранжмани кои ќе ја земат предвид новата реалност во Појасот Газа“, рече Штаје на состанокот на владата.
Палестинската управа управува со дел од окупираниот од Израел Западниот Брег и ја загуби власта во Газа од Хамас по борбата за власт во 2007 година.
Некои информации за овој извештај дојдоа од Асошиетед прес, агенцијата Франс прес и Ројтерс.