Израелската војска во средата издаде нови предупредувања за евакуација на луѓето во делови од долината Бека во источен Либан, предупредувајќи на воени операции против цели на Хезболах во областа.
Портпаролот на израелските одбранбени сили рече дека луѓето во Баалбек, Аин Бурдеј и Дорис треба да ги напуштат своите домови.
Израелските сили често ги следеа ваквите предупредувања со воздушни напади додека ја спроведуваат кампањата што израелските власти велат дека има за цел да го потисне Хезболах назад од израелско-либанската граница.
Израел ги користеше истите методи во својата војна против Хамас во Појасот Газа, додека официјални лица на ОН и хуманитарните организации ги критикуваа наредбите за евакуација велејќи дека цивилите имаат мали шанси да се подготват и често немаат каде безбедно да одат среде војната.
Забрана на УНРВА
Генералниот секретар на ОН, Антонио Гутереш, му пиша на израелскиот премиер Бенјамин Нетанјаху, изразувајќи загриженост поради новото израелско законодавство со кое ќе се забрани главната агенција на ОН што ги поддржува палестинските бегалци.
„Генералниот секретар напиша и испрати писмо пред неколку часа до премиерот на Израел, во кое ги истакнува неговите грижи, прашањата на меѓународното право што се покренати со овој закон“, изјави портпаролот Стефан Дујарик.
„Очигледно, доколку се спроведе, јасно е дека ќе има разорно влијание врз хуманитарната ситуација на Палестинците на окупираната територија“, додаде Дујарик.
Тој рече дека Гутереш му напишал и на претседателот на Генералното собрание на ОН, кое го формираше УНРВА во декември 1949 година.
Гутереш претходно ги критикуваше двата закони, кои треба да стапат на сила за 90 дена, за кои рече дека „може да има катастрофални последици“ за палестинските бегалци.
Гутереш, исто така, го повика Израел да ги исполни своите обврски според меѓународното хуманитарно право и рече дека националното законодавство „не може да ги промени тие обврски“.
Претставникот на Израел во ОН, Дени Данон, рече дека „УНРВА Газа стана фронт за Хамас“ и го обвини Гутереш дека го игнорирал тој „неоспорен факт“.
Исто така во вторникот, палестинските здравствени власти соопштија дека израелски воздушен напад погодил петкатна станбена зграда во северниот дел на Газа, при што загинале најмалку 70 луѓе.Дополнителни 23 лица се водат како исчезнати по нападот во Беит Лахија. Во вториот напад подоцна во вторникот загинаа најмалку 18 лица, соопштија здравствените власти.
Израелската војска соопшти дека го истражува првиот напад, но не го коментираше вториот. Таа извести дека четворица нејзини војници биле убиени во борбите, со што билансот од почетокот на операцијата се искачи на 16.
Обединетите нации изразија длабока загриженост за големиот број жртви, велејќи дека не можат да пристапат до Беит Лахија.
Новото израелско законодавство ја забранува Агенцијата на Обединетите нации за помош и работа за палестинските бегалци на Блискиот Исток, или УНРВА, и им забранува на израелските службеници да имаат каков било контакт со претставниците на УНРВА.
Норвешкиот премиер изјави во вторникот дека неговата влада ќе поднесе резолуција до Генералното собрание на ОН за да побара пресуда од Меѓународниот суд на правдата за тоа дали Израел ќе го прекрши меѓународното право.
„Ова го поткопува правото на Палестинците да добиваат хуманитарна помош и помош за спасување на животите“, рече премиерот Јонас Гар Штере.
„Имаме колективна обврска да одговориме на ова“, рече тој.
Во Советот за безбедност на ОН, 15-те земји-членки поединечно изразија загриженост за законодавството, а многу од нив се осврнаа на УНРВА како „спас“ за Палестинците на окупираните територии и признавајќи дека тоа е „рбетот“ на операцијата за помош на ОН во Газа.
Американската претставничка го повика шефот на ОН Гутереш да создаде механизам за преглед и решавање на наводите дека персоналот на УНРВА има врски со Хамас.
„Во исто време, знаеме дека во моментов, нема алтернатива за УНРВА кога станува збор за испорака на храна и друга помош за спасување во Газа“, рече Линда Томас-Гринфилд.
„Затоа, имаме загриженост за спроведувањето на оваа легислатива“, рече таа.
Генералниот комесар на УНРВА, Филип Лазарини, во изјавата во понеделникот рече дека нацрт-законот „поставува опасен преседан“.
„Ова е најновата во тековната кампања за дискредитирање на УНРВА и делегитимирање на нејзината улога во обезбедувањето помош и услуги за човечки развој на палестинските бегалци“, напиша тој на платформата на социјалните медиуми Х.
Израел обвини десетици вработени во УНРВА дека се членови на Хамас, а некои за учество во терористичките напади на 7 октомври 2023 година. УНРВА соопшти дека презела акција против десетина вработени за кои Израел доставил докази во врска со нивната вмешаност во терористичката група. Меѓутоа, во десетици други случаи, УНРВА добила или недоволни или никакви докази од израелските власти.
Законодавството доаѓа во време кога Светската програма за храна предупредува дека гладот им се заканува на делови од Газа, здравствената заштита е во хаос, а хуманитарците велат дека се соочуваат со бројни пречки во добивањето помош за најпотребните, вклучително и израелските одбивања и опструкции и Газанците кои ограбуваат конвои. ОН во вторникот соопштија дека 80 отсто од жителите на Газа - околу 1,7 милиони луѓе - не ја добиле својата октомвриска храна.
На 15 октомври, администрацијата на Бајден му даде на Израел 30 дена да ја подобри хуманитарната ситуација во Газа или да се соочи со последици според американскиот закон што може да вклучи и намалување на военото финансирање. Амбасадорката Томас-Гринфилд во вторникот во Советот за безбедност ја повтори загриженоста на Вашингтон за хуманитарната ситуација.
„Дека САД отфрлаат какви било напори на Израел да ги изгладне Палестинците во Џабалија или на кое било друго место“, рече таа мислејќи на опколениот палестински камп во северна Газа.
„И дека зборовите на Израел мора да се усогласат со акција на теренот. Во моментов, тоа не се случува. Ова мора веднаш да се промени“.рече таа.
Последниот конфликт во регионот започна кога милитантите на Хамас убија 1.200 луѓе и заробија околу 250 заложници во нивниот напад на Израел на 7 октомври 2023 година. Израел вели дека верува оти Хамас сè уште држи 101 заложник, вклучително и 35 за кои војската вели дека се мртви.
Во израелската контраофанзива во Газа загинаа повеќе од 43.000 Палестинци, според Министерството за здравство на територијата, а Израел вели дека бројот на загинати вклучува илјадници милитанти.Израелската кампања опустоши голем дел од Појасот Газа, додека борбите и израелските наредби за евакуација раселеа околу 90% од населението на Газа од 2,3 милиони луѓе.
Дописничката на Гласот на Америка на ОН, Маргарет Бешер, даде свој придонес во овој извештај. Некои информации за овој извештај дојдоа од Асошиетед прес, агенцијата Франс прес и Ројтерс.