Иднината на Западен Балкан е во Европската Унија, заклучија лидерите на самитот ЕУ-Западен Балкан, кои денес ја реафирмираа европската перспектива на регионот.
Тие ја нагласија и потребата за одржливи реформи, поткрепени со вредностите и принципите на ЕУ.
Главните теми на разговор беа: доближување на партнерите од Западен Балкан до ЕУ и унапредување на постепената интеграција, градење на економска основа за иднината и ублажување на влијанието на руската агресивна војна против Украина, како зајакнување на безбедноста.
„ЕУ го поздравува напредокот постигнат од страна на партнерите од Западен Балкан на нивните соодветни патишта во ЕУ од Самитот ЕУ-Западен Балкан во Тирана. Иднината на Западен Балкан е во нашата Унија“, се вели во бриселската декларација.
Во декларацијата „ЕУ ја поздравува решеноста на партнерите од Западен Балкан да ја почитуваат и да се обврзат основни европски вредности и принципи, во согласност со меѓународното право. ЕУ исто така ја поздравува повторената посветеност на партнерите од Западен Балкан за приматот на демократијата, основните права и вредности и владеењето на правото“.
ЕУ ја истакна потребата за посветеност на Западен Балкан на инклузивна регионална соработка и зајакнување на добрососедските односи, вклучително со земјите-членки на ЕУ.
„Спроведување на билатерални договори со добра волја и опипливо резултати, вклучително и Договорот од Преспа со Грција и Договорот за пријателство, добрососедството и соработката со Бугарија и понатаму се важни“, пишува во декларацијата.
ЕУ ја нагласи потребата од постојани напори во борбата против корупцијата и организираниот криминал, добро владеење, човекови права, родова еднаквост и правата на лицата кои припаѓаат на малцинствата.
„Кредибилитетот на овие заложби зависи од значајното спроведување на потребните реформи и градењето солидна евиденција поткрепена со јасна и конзистентна јавна комуникација во интерес на својот народ“, велат лидерите на ЕУ, и додаваат дека „клучни се независните и плуралистички медиуми, со целосно почитување на слободата на изразување компоненти на секој демократски систем“.