Калифорнија е сојузна држава која ограничува локална полициска соработка со федералните органи за имиграција, забранувајќи им да дејствуваат како агенти за имиграција или да апсат исклучиво за прекршување на граѓанските имиграциски права.
Во рамки на оваа таканаречена држава-засолниште, градот Хантингтон Бич прогласи дека не е засолниште за илегална имиграција со цел спречување на криминалот.
„Ако лице без документи изврши некаков вид на криминал, особено грозоморно злосторство, сакам да биде отстрането и сакам да го имаме секое ниво на спроведување на законот за да ја одржуваме нашата заедница што е можно побезбедна. И ако ја отстраните таа врска, тоа ниво на спроведување на законот, можеби ќе ослободиме некој што не сакаме да се врати во нашата заедница“, вели Пет Брнс, градоначалник на Хантингтон бич.
Маи До е од Институтот Харбор, кој обезбедува истражување и поддршка на политиките на локалните проимигрантски организации.
Таа вели дека нема докази дека градовите кои служат како засолништа се помалку безбедни.
„Студија по студија докажа дека градовите кои служат како засолништа не само што не го зголемуваат криминалот, туку тие всушност го намалуваат криминалот, и затоа вложувањето на политичарите во Хантингтон Бич во обид да ја промовираат оваа политика против овие градови всушност покажува дека тие не инвестираат во промовирање на јавната безбедност“, вели До.
Сопственикот на локален ресторан Чарли Забла поддржува Хантингтон Бич да не биде град засолниште.
„Со поминување на границите и нелегално влегување овде, веќе сте направиле кривично дело. Сте го прекршиле законот и тоа не е прифатливо. Дојдов овде по легален пат. Ја направив вистинската работа. Чекав ред. Јас си ги завршив обврските. Ми требаа 12 години да станам државјанин“, вели Забла.
Незаконското присуство во САД е граѓанско прекршување, а не кривично дело. Незаконски влез е прекршок.
Повторното влегување во земјата илегално по отстранувањето е кривично дело казниво до две години затвор.
Извршната наредба на претседателот Доналд Трамп наречена „Заштита на американскиот народ од инвазија“ ќе одбие федерални средства за засолништата. Сè уште не е јасно кои федерални средства ќе бидат скратени на кои јурисдикции, вклучително и Калифорнија.
Да се направи себеси град кој не е засолниште е во голема мера симболичен потег за Хантингтон Бич, бидејќи тие не го контролираат локалното спроведување на законот, вели професорката по право Aни Лаи.
„Оваа декларација на градот ќе има ограничено влијание затоа што градовите немаат свои затвори, генерално. Субјектот што ги контролира затворите е Одделот на шерифот на округот Оринџ. Одлуката се носи на различно место“, вели Лаи.
Кога Калифорнија го донесе својот закон за засолништа во 2017 година, првата администрација на Трамп пред судот тврдеше дека се мешала со имиграциските власти кои го спроведуваат федералниот закон.
Окружниот апелационен суд пресуди во корист на државата, а Врховниот суд на САД одби да го разгледа случајот.