Бугарија се чини подготвена за долги и тешки коалициски разговори, откако парламентарните избори, петти во последните две години, повторно не дадоа јасен победник.
Блокот предводен од централно-десничарската партија ГЕРБ на поранешниот премиер Бојко Борисов освои 26,5 отсто од гласовите на изборите во неделата, додека прозападниот реформистички блок предводен од „Продолжуваме со промената (ПП)“ имаше 24,9 отсто, според прелиминарните резултати засновани на 96% од преброените гласачки ливчиња.
Националистичката партија „Преродба“, која е наклонета кон рускиот претседател Владимир Путин во војната во Украина, го зазеде третото место со 14,4%, што е неколку процентни поени повеќе од претходните избори во октомври минатата година.
Партијата на етничките Турци ДПС беше на четвртото место со 13 отсто, а Бугарската социјалистичка партија (БСП), наследник на некогаш моќната Комунистичка партија, доби 9 отсто гласови.
Продолжениот политички ќорсокак во Бугарија, предизвикан главно од лични непријателства меѓу лидерите на двата главни блока, веќе ја принуди земјата да го одложи датумот за усвојување на еврото, а не е усвоен ни предлог-законот за буџетот за 2023 година.
Неизвесноста, исто така, ја попречи способноста на Бугарија да ги искористи фондовите на ЕУ за закрепнување по пандемијата, а аналитичарите и гласачите стравуваат дека исходот од изборите во недела би можел на крајот да доведе до одржување на уште едни избори подоцна оваа година.
Замор кај гласачите
„Ќе има уште едни избори, па не очекувам многу (од овие резултати). Можеби треба да се формира влада од експерти“
„Ќе има уште едни избори, па не очекувам многу (од овие резултати). Можеби треба да се формира влада од експерти“, вели Љубомир Ранов, 47-годишен дизајнер на ентериер во главниот град Софија на прашањето за резултатите.
Бугарските гласачи се уморија од неуспехот на нивните политичари да ги остават настрана нивните разлики и да соработуваат за формирање влада способна да се справи со кризата со трошоците за живот и да ја искорени неконтролираната корупција.
„На крајот треба да се формира влада затоа што одиме на избори веќе две години. Се трошат државните средства за финансирање на овие избори, иако тие можеа да се искористат за сосема различни цели“, рече Шишман Шишманов (30). финансиски брокер.
Продолжуваме со промената (ПП) и нејзиниот сојузник Демократска Бугарија (ДБ) ја обвинуваат ГЕРБ за неконтролирана корупција во најсиромашната земја членка на ЕУ за време на нивното децениско владеење кое заврши во април 2021 година, нешто што Борисов го негира.
За некои гласачи, Борисов, политички ветеран, може да помогне да се врати одредена стабилност во Бугарија во услови на зголемена инфлација и геополитички грижи поттикнати од војната во Украина. Но, ПП/ДБ досега ја отфрлија можноста за коалиција со ГЕРБ.
И Борисов и Кирил Петков, 42-годишниот лидер на ПП образован на Харвард, сакаат Бугарија, членка на НАТО, иако со блиски историски и културни врски со Русија, да го задржи својот проукраински став во војната.
Во поголемиот дел од изминатите две години, Бугарија беше управувана од технократски преодни влади назначени од претседателот Румен Радев.
Официјалните конечни резултати од изборите во недела се очекуваат најдоцна до 6 април. Радев вети дека брзо ќе го покани лидерот на партија што освоила најмногу гласови да започне коалициски разговори.
Извор: Ројтерс