Американскиот секретар Антони Блинкен во вторникот отпатува за Лондон каде што треба да се сретне со своите британски и украински колеги пред конференцијата фокусирана на поттикнување меѓународна поддршка за помош на Украина да се опорави од ефектите на руската инвазија.
Велика Британија и Украина се кодомаќини на конференцијата што се одржува во среда и четврток.
Како дел од Светскиот ден на бегалците во вторник, Блинкен и британскиот министер за надворешни работи Џејмс Клеверли го обиколија центарот во Лондон формиран за да им помогне на Украинците кои избегаа од војната да добијат совет и поддршка што им е потребна за да се прилагодат на животот во Британија.
По билатералните разговори со Клеверли, Блинкен подоцна во вторник треба да разговара и со украинскиот министер за надворешни работи Дмитро Кулеба.
Британскиот премиер Риши Сунак во понеделникот телефонски разговараше со украинскиот претседател Володимир Зеленски пред Конференцијата за закрепнување на Украина.
„Тоа беше единствена можност да се нагласи силната поддршка од јавниот и приватниот сектор за Украина и да се демонстрира трансформацијата на земјата и тековните реформи, се согласија лидерите“, се вели во соопштението од канцеларијата на Сунак.
Британија е вториот најголем донатор на воена помош за Украина од инвазијата на Русија во февруари 2022 година, зад само САД.
Зеленски рече дека очекува конференцијата да ги консолидира различните напори за закрепнување и дека закрепнувањето „треба да му покаже на светот дека слободата е непобедлива“.
Зеленски, во своето ноќно обраќање во понеделникот, исто така ја пофали Британија за новата легислатива што ќе овозможи пренасочување на руските средства замрзнати под санкциите за да се плати за обновата на Украина.