Американскиот претседател Џо Бајден и поранешниот претседател Доналд Трамп се во посета на американско-мексиканската граница, при што безбедноста на границата најверојатно ќе биде главно прашање на кампањата на претседателските избори во ноември.
Бајден оди во Браунсвил, Тексас, кој се наоѓа во регион каде што илегалните премини во Соединетите држави драстично се намалија во последниве години.
Белата куќа соопшти дека Бајден ќе има обраќање и ќе добие брифинг за ситуацијата на границата од Царината и граничната заштита на САД, Службите за државјанство и имиграција на САД и Службата за имиграција и царина на САД.
Трамп, кој се обиде да изгради обемен ѕид на границата меѓу САД и Мексико за време на неговото претседателствување, ќе оди во Игл Пас, Тексас, кој е дел од секторот кој беше еден од најпрометните за нелегални преминувања во последните месеци.
Безбедноста на границите е во центарот на законодавните дебати во Вашингтон, бидејќи администрацијата на Бајден се залагаше за безбедносен пакет со ново финансирање за Украина и Израел. Републиканците, особено во Претставничкиот дом, се залагаа за вклучување на мерките за безбедност на границата во нацрт-законот.
Трамп е против двопартискиот предлог на Сенатот кој содржи голем број одредби за гранична безбедност заедно со помошта за Украина, што на крајот доведе до нејзин пораз во Сенатот. Оттогаш, републиканците во Претставничкиот дом инсистираат на тоа граничното прашање да се реши самостојно пред каква било акција за странска безбедносна помош.
Некои информации за овој извештај дојдоа од Асошиетед прес.