На распитот на сенатската комисија за надворешни работи за потврдување на функцијата, идниот амбасадор на САД во Република Македонија Филип Рикер рече дека негов приоритет ќе биде промовирање на американските интереси и унапредувањето на партнерските релации, при што нагласи дека односите меѓу САД и Македонија никогаш не биле поблиски.
Од последниот пат кога бев во Македонија во 1999-та- земјата има направено голем чекор напред – рече Рикер. И покрај сите предизивици и премрежја во изминатата деценијата, Македонија денес е стабилна унитарна и модел за мултиетничка демократија. Македонија е голем американски сојузник на сите глобални фронтови на денешницата:
-Имав можност и чест да се сретнам со македонските ренџери кои се распоредени рамо до рамо со американските сили во ирачките град Таџи. Тие се храбри и професионални војници кои се дел од коалиционите сили во Ирак уште од 2003-та.
На новата функцијата ќе ги промовирам американските интереси на партнерска основа со земјата –домаќин, рече Рикер:
-Ако бидам потврден на функцијата, ќе продолжам да им помагам на лидерите и народот од Македонија преку реформите да постигнат мултиетничка демократија и слободен пазар, како и во нивно интегрирање во НАТО и во ЕУ.
На прашање од сенаторот Роберт Менендез – дали планира да биде вклучен во напорите за надминување на прашањето со разликите околу името, Рикер одговори:
- Да, сенаторе. Ако бидам потврден на функцијата ќе работам преку нашата амбасада во Скопје, како и преку амбасадата во Атина, во правец на охрабрување на двете страни да пронајдат брзо обострано решение, затоа што тоа не е само во интерес на Македонија и Грција, туку и на поширокиот регион.
На Распитот во сенатската комисија за надворешни односи, Менендез на Рикер му постави и незгодни прашања за легитимитетот на изборите во Македонија со оглед на изборните инциденти, за картите со Голема Македонија кои се појавиле во некои учебници, како и дали земјата може со вакви избори да стане членка на НАТО. Рикер остана на својот позитивен став за Македонија.