Украинската заменик-министерка за одбрана Хана Маљар денес изјави дека имало жестоки борби во Соледар, но дека украинските сили се држат.
Маљар зборуваше еден ден по спротивставените тврдења за тоа кој го контролира градот во источна Украина.
Американскиот секретар за одбрана Лојд Остин во средата ја нарече битката за Соледар „динамична средина, динамична борба“ поради извештаите дека таа паднала во рацете на Русите.
„Во овој момент, не можеме да го потврдиме тоа известување“, рече Остин на заедничкиот брифинг за печат со државниот секретар Антони Блинкен и нивните јапонски колеги во Стејт департментот.
Евгениј Пригожин, шефот на руската платеничка група Вагнер, во средата рече дека неговите сили го зазеле целиот рударски град и убиле 500 украински војници во тешките борби.
Неколку минути подоцна, украинскиот претседател Володимир Зеленски рече дека борбите продолжуваат.
Русите „се обидуваат да се преправаат дека дел од нашиот град Соледар е некој вид руска сопственост“, рече тој во видео обраќањето. „Но, борбите продолжуваат“.
Во соопштението на Фејсбук, украинскиот генералштаб соопшти дека руските сили трпат големи загуби. Русија се обидува да го заземе градот поради ископите на сол, неговите солени пештери и близината до Бахмут.
Некои информации за овој извештај се од агенцијата Франс прес и Ројтерс.