Кремљ ги обвини Киев и Вашингтон дека не ги земаат предвид руските грижи, и обвини оти САД ја користат Украина како бојно поле за да ја ослабат Русија.
Изјавата дојде во време кога претседателот Владимир Путин рече дека Русија сака брз прекин на борбите.
„Нашата цел е да ставиме крај на овој конфликт. Ние се стремиме кон тоа“, им рече тој на новинарите. „Ќе се обидеме да се погрижиме сето тоа да заврши, и колку побрзо, толку подобро“.
„Сите конфликти завршуваат, на овој или оној начин, со разговори. Колку побрзо нашите противници го разберат тоа, толку подобро ќе биде“, рече Путин.
Москва рече дека руските сили сега се фокусирани на преземање контрола врз источниот регион Доњецк, каде што погодениот град Бахмут стана епицентар на борбите.
Официјални лица во Москва во последниве месеци постојано повторуваа дека не ја исклучуваат можноста за разговори со Украина.
Тие го обвинија затворањето на дипломатските канали на претседателот Зеленски, кој рече дека нема да преговара додека Путин е на власт.
Украинскиот лидер се врати од историското патување во Вашингтон, каде му рече на Конгресот дека неговата земја е жива и дека поддршката е инвестиција во глобалната безбедност.
За време на посетата американскиот претседател Џо Бајден најави речиси 1,8 милијарди долари воена помош, вклучувајќи го и системот за противракетна одбрана Патриот.
Путин предупреди дека ова може дополнително да го влоши конфликтот.
Извор: Агенција Франс-прес