Се чини дека Германија не гледа на руските воени закани против Украина со истото чувство на итност како САД и некои од нивните европски сојузници, кои почнаа да го идентификуваат Берлин како слаба алка во западната алијанса, велат дипломати и аналитичари.
Новиот канцелар на земјата, Олаф Шолц, ги нагласи строгите предупредувања од Западот за огромните последици за Русија доколку претседателот Владимир Путин нареди инвазија на Украина. Германија исто така ги одби барањата на Украина за воена помош, што предизвика огорченост во Киев. Берлин ги блокираше и балтичките држави Летонија, Естонија и Литванија да го снабдуваат Киев со оружје од германско производство.
Украинското вознемирување само се продлабочи во саботата кога шефот на германската морнарица, заменик-адмиралот Кеј-Ахим Шенбах, ги опиша стравувањата на Западот од руска инвазија како „глупост“ и повика на Владимир Путин да му се даде „почитта што тој ја бара - и веројатно заслужува”. Германското Министерство за одбрана брзо ги осуди коментарите, а адмиралот веднаш поднесе оставка.
Тоа не успеа да го смири украинскиот бес. Киев верува дека забелешките на адмиралот го одразуваат размислувањето на дел од германскиот естаблишмент и го повика Берлин да ја промени целата своја позиција за геополитичкиот конфликт.
„Денес, повеќе од кога било, цврстината и солидарноста на Украина и нејзините партнери се важни за да се ограничат деструктивните намери на Русија“, соопшти украинското Министерство за надворешни работи.
Украинските власти посочуваат на низа разочарувачки германски позиции во услови на зголемени стравови на Западот дека се зголемува моментумот на војната.
„Сè оди кон вооружен конфликт“, вели началникот на одбраната на Естонија, генерал Мартин Херем. Тој и неговите колеги од Централна Европа внимателно следат дали руските резервисти се мобилизирани. Тие се плашат дека Путин ја превооружува Русија во изминатата деценија за овој момент и дека сега само чека студеното време повеќе да ја зацврсти земјата.
Берлин остана двосмислен околу тоа дали ќе биде подготвен во случај на војна да го затвори штотуку завршениот подморски гасовод Северен тек 2, кој ќе транспортира природен гас од Русија во Германија.
Одговарајќи на зголемениот домашен и меѓународен притисок, Шолц минатата недела рече дека Германија е подготвена да разговара за затворање на гасоводот доколку Русија нападне, но се огради да преземе нешто повеќе.
Двосмисленоста на Шолц загрижува многу членки на НАТО.
Берлин ги отфрли предлозите кои вклучуваат исклучување на Русија од меѓународниот систем за прекугранични плаќања SWIFT. Минатата недела, германските власти изјавија за водечкиот деловен весник во земјата дека исклучувањето на Русија од SWIFT не се разгледува.
Советот за национална безбедност на САД го негираше ова, велејќи дека „ниту една опција не е надвор од масата“.
Наметнувањето нови опсежни и казнувачки санкции кон Русија, најверојатно, ќе има големи економски последици за Германија, особено ако Москва возврати со прекинување на испораките на природен гас за Германија.
Како и другите западноевропски земји, Германија се бори со енергетската криза и зголемените цени на енергијата. Според Евростат, заводот за статистика на Европската унија, Германија купува од 50 до 75 отсто од своите испораки на природен гас од Русија.
Десет други членки на ЕУ, вклучувајќи ги Бугарија, Чешка, Естонија, Летонија и Унгарија, исто така добиваат повеќе од три четвртини од нивниот увоз на природен гас од Русија.
Украинските власти - и сојузниците на Германија во НАТО - се плашат од какво било колебање од страна на еден таков клучен играч како што Германија ризикува да биде видена од рускиот претседател, кој во минатото умеел да ги искористи европските поделби, како доказ дека сојузот против него не е толку обединет како Вашингтон и Киев би посакале.