Армијата поактивно се вклучува во секојдневното справување на општините со ситуацијата со коронавирусот. Меѓу првите е Прилеп – таму од денеска припадници на армијата се распоредени низ градот – градоначалникот побарал ваква мерка зашто во Прилеп се зголемува бројот на заболени.
„Денеска пред маркетите, банките ќе видите припадници на амријата чија задача не е да создаваат страв, туку да прават повеќе ред“ изјави Радмила Шеќеринска, вицепремиерка и министерка за одбрана.
„Се поважна е потребата од координација меѓу локалните и централната власт“ рече Бујар Османи, главен координатор на кризните штабови на единиците на локалната самоуправа.
Армијата се распореди и во Куманово каде, исто така, ќе биде на располагање на локалниот кризен штаб за справување со пандемијата. Освен воспоставување ред на места каде има метеж, војниците ќе помагаат и при дистрибуција на производи и дезинфекција на јавните површини.