Турскиот претседател Реџеп Таип Ердоган победи на изборите викендов, освојувајќи преку 52 процента од гласовите. Во обраќањето пред илјадниците симпатизери, тој истакна дека ова значи победа на демократијата и на секој граѓанин во неа.
Неговиот противкандидат изборите ги опиша како нефер и изрази загриженост за иднината на државата.
Ердоган сега ги презема големите нови овластувања усвоени на минатогодишниот уставен референдум, што беше проследен со наводи за измама.
64-годишниот лидер сега има моќ да владее со декрет, заедно со поголема контрола над назначувањето на врвни судии и парламентот чија улога е значително намалена по укинувањето на функцијата премиер.
Победата на Ердоган ја поздрави рускиот претседател Владимир Путин, кој ја подвлече неговата подготвеност за продолжување на блиската соработка и дијалог.
Честитки стигнаа и од Генералниот секретар на НАТО Јенс Столтенберг, кој сепак додаде дека Алијансата е базирана на одредени основни вредности - демократија, владеење на правото и индивидуалните слободи.
Меѓу земјите кои ја поздравија победата на Ердоган се и Кина, Иран, Србија и Босна и Херцеговина.