Се зголемува потребата на јавноста за веродостојни информации, а некои влади прават напори да го ограничат пристапот до нив, заклучија претставници на Емитувачкиот одбор на управници и на Школата за медиуми на Универзитетот Џорџ Вашингтон, по повод Меѓународниот ден на слободата на печатот.
„Гледаме дека тоа што се случува и што излегува од Кремљ, е многу повеќе од само погрешна нарација. Фактите навистина се доведени во прашање од ваквите режими во светот, како што сега се случува и во Турција“, изјави Џон Ленсинг, извршен директор на Емитувачкиот одбор на управници.
Минатата недела организацијата „Репортери без граници“ објави извештај за слободата на печатот за 2017-та година, според кој Русија се најде на 148-то место од 180 држави, а од 2012-та година водечките независни медиуми биле ставени под владина контрола или затворени.
Според извештајот на „Фридом хаус“, слободата на печатот во светот падна на најниско ниво во последните 13 години, а главната причина е заканата кон новинарите и медиумите во големите демократии.
Како одговор на прашањата дали Гласот на Америка ќе може да остане неутрална, а не да стане глас на администрацијата на претседателот Доналд Трамп, Ленсинг рече дека „луѓето треба да разберат дека тоа би било спротивно на Повелбата на Гласот на Америка“.
Facebook Forum