Началникот на здружениот генералштаб на Јужна Кореја изјави дека постојат индиции дека Северна Кореја се подготвува да испрати повеќе војници и оружје за да ги поддржи руските воени напори во Украина.
Дополнителните оружја што се подготвуваат вклучуваат самоуништувачки беспилотни летала, а Северна Кореја во Русија веќе испрати ракетни фрлачи од 240 милиметри и артилерија од 170 милиметри, се вели во соопштението на здружениот генералштаб.
Северна Кореја, исто така, веќе испратила околу 12 илјади војници во Русија, според Јужна Кореја, САД и Украина.
Здружениот генералштаб соопшти дека најмалку 1 100 Севернокорејци се убиени или ранети.
Украинската војска соопшти дека соборила 47 воздушни беспилотни летала што руските сили ги лансирале во нападите во текот на ноќта насочени кон повеќе области на земјата.
Украинските воздухопловни сили соопштија дека Русија употребила вкупно 72 беспилотни летала во најновата рунда дневни воздушни напади.
Украинската воздушна одбрана собори беспилотни летала над регионите Черкаси, Чернихив, Харков, Хмелницки, Киев, Одеса, Полтава, Суми и Житомир, соопшти војската.
Гувернерот на Хмелницки, Серхи Тиурин, на Телеграм изјави дека нападите со беспилотни летала оштетиле бизнис и некои домови, додека едно лице е повредено.
Руското Министерство за одбрана соопшти дека уништило украинско воздушно беспилотно летало над регионот Брјанск, кој се наоѓа долж руско-украинската граница.
Гувернерот на Брајанск Александар Богомаз на Телеграм изјави дека нема извештаи за штети или жртви од украинскиот напад.
Дел од информациите во овој извештај се од агенцијата Франс-прес и Ројтерс.