Лекарите препорачуваат срцевите и белодробни болни да не излегуваат од дома кога времето е мошне топло. Каусалја Пендјал им вели на своите пациенти во Ричмонд, сојузната држава Вирџинија, пред да излезат надвор, да го проверат индексот на квалитетот на воздух – проценка на загадувачите во воздухот што секојдневно ја врши американската влада:
„Да се избегнуваат надворешни активности, особено во попладневните и вечерни часови“, вели таа.
Медицинската наука, поткрепена со истражување на владината Агенција за заштита на животната средина, најде цврста врска меѓу загадувањето на воздухот и срцевите заболувања. Доктор Роберт Брук е специјалист по кардиоваскуларна медицина на Универзитетот во Мичиген:
„Бидејќи кардиоваскуларните заболувања се причина број еден за смрт, не само во развиените земји, туку и ширум светот, загадувањето на воздухот има огромен ефект на морталитетот на глобално ниво“, смета д-р Брук.
Тој вели дека само еден до два часа вдишување на издувни гасови од автомобилите, може да биде кобно. Долгорочните ефекти од загадениот воздух се уште поалармантни:
„По неколку години на изложеност, зголемувањето на ризикот од срцеви напади и мозочни удари се најверојатно пет до десет пати отколку при изложеност од само неколку часа“.
Истражувањето покажа дека најпогодени се постарите, луѓето кои веќе имаат срцеви проблеми, и лица главно од сиромашни квартови, кои живеат до главни автопатишта.
Американското здружение за срцево здравје препорачува намалување на времето минато во густ сообраќај, да се изегнува џогирање во фрекфентни часови, и подобар третман на кардиоваскуларните ризични фактори.