Минеаполис отпушти четворица полицајци вклучени во апсењето во понеделникот на еден Афроамериканец, кој почина откако врз неговиот врат клечел еден полицаец белец.
Случаен минувач снимил видео од инцидентот и го објавил на социјалните мрежи по што истиот брзо се емитуваше низ целата држава.
Градоначалникот на Минеаполис, Џејкоб Фреј, објави дека отпуштањето на четворицата полицајци е „правилен потег“.
„Тој не требаше да умре. Она што го видовме беше ужасно. Животот на овој човек е важен “, рече градоначалникот. „Верувам дека она што го видов беше погрешно на секое ниво. Да се биде црн во Америка не треба да биде смртна казна “.
Жртвата е Џорџ Флојд. Полицијата во Минеаполис соопшти дека тој наликувал на осомничен во случај на фалсификување и дека полицајците дејствувале откако Флојд се спротивставил на апсењето.
На видеото се гледа полицаец како му става лисици на рацете на Флојд на земја и клекнува на неговиот врат.
„Те молам, те молам, не можам да дишам. Те молам, човеку“, може да се слушне како вели тој додека минувачите викаат по полицијата да му ја олесни положбата.
Полицаецот над Флојд го повикува да се „опушти“, но го држи коленото на неговиот врат неколку минути откако жртвата престана да се движи. Еден сведок рече дека го слушнал Флојд како ја повикува својата мајка пред да умре.
Полицијата во Минеаполис најави целосна истрага, додека ФБИ ќе истражува дали се повредени граѓанските права на Флојд.
Стотици луѓе се собраа во вторникот навечер на местото каде што Флојд почина во знак на протест поради трагедијата. Тие маршираа неколку километри по што се судрија со полицијата. Најмалку еден полициски автомобил е уништен, а во немирите се искршени и прозорци од зградата на полицијата. Полицијата возврати со солзавец и гумени куршуми кон демонстрантите.
Клекнувањето на вратот на осомничениот е прифатлива тактика за осомничени кои се спротивставуваат на апсење во Минеаполис, а градскиот полициски синдикат ја замоли јавноста да почека додека не заврши истрагата, пред да се „осудат нашите полицајци“.
Facebook Forum