Линкови за пристапност

Во САД се одбележува најстарата и најславената традиција, Денот на благодарноста - 2003-11-27


Пред речиси два века, групи дисиденти се подготвиле да патуваат од Англија во Новиот свет во потрага по верска слобода.

Една група верници Протестанти пристигнала во она што денеска е градот Плимут во Масачусетс кон крајот на 1620 година. Тие тешко ја минале првата зима во Америка. Речиси половината гладувале или измрзнале. Но со помош на Индијанците, колонистите верници научиле каква храна да јадат и како да градат куќи.

Маршал Фишвик е професор по комуникации и популарна култура на Институтот по политехника во Вирџинија и на државниот Универзитет Блекбург.

„Луѓето биле бегалци. И имале психологија на бегалци, што значи дека биле многу исплашени. Првиот Ден на благодарноста се случил затоа што биле благодарни што воопшто стигнале таму, затоа што да се стигне во тие времиња било веќе половина пат, а дури и не знаеле каде навистина се наоѓаат. Затоа Денот на благодарноста започнува со многу длабок психолошки копнеж за нов дом и нова порака. Оттаму има необичен квалитет. Американците секогаш бараат нова визија.А новата визија тогаш била изразување на благодарноста во непознатиот свет. Тоа опстанало сите овие години до денеска“, вели Фишбик.

Првиот Ден на благодарноста бил фестивал на жетвата во есента 1621 година, или помалку од една година откако пристигнале колонистите. Се смета дека на прославата присуствувале околу 50 верници и 90 Индијанци и јаделе иста храна која сега се смета за традиционална на Денот на благодарноста – зеленчук и печена мисирка.

Но за колонистите, оваа прва прослава била повеќе секуларна отколку верска. Во најголем дел, тридневната прослава била гозба и игри. И никогаш не била повторена. Забава на која специјално му се оддава благодарноста на Бога би била незамислива за строго религиозните колонисти или Пуританци како што ги нарекувале често, кои ја насочиле својата енергија на христијанскиот сабат, на неработни денови за верски обреди. Всушност, првиот Ден на благодарноста што го прогласиле верниците бил летото 1623 година, кога му се заблагодарувале на Бога за крај на сушата и тоа било релативно тажен настан.

Иако Денот на благодарноста повремено бил одбележуван во првите години на историјата на земјата, всушност не бил прославуван официјално до 1863 година, за време на Американската граѓанска војна.

Викторијанскиот имиџ на Денот на благодарноста не бил само огледало на минатото на нацијата туку исто така прозорец низ кој Американците гледале на својата судбина. Но многу историчари брзо посочуваат дека до крајот на 19-от век, повеќето американски Индијанци биле присилени да живеат во резервати и дека верската толеранција и расната еднаквост се уште биле далеку со децении. А денеска критичарите докажуваат дека Денот на благодарноста често се сведува на гледање фудбал, прејадување и почеток на божиќната сезона за купување.

Соломон Давидоф е историчар на Иститутот за уметност и комуникации на Нова Англија во Бруклин, Масачустетс. Професорот Давидоф, чии еврејски претци емигрирале во САД од Источна Европа велат дека Денот на благодарноста и натаму е важен дел на американската култура.

„Ако го погледнете приливот на имигранти во САД, особено кон крајот на 1800-те и 1900-те години, кога Денот на благодарноста навистина почнал да се слави како национален празник, заедно со 4 јули, тој бил сметан за најкарактеристичен американски празник. Оттаму, дефинитивно гледате дека прославата на Денот на благодарноста е повеќе за оние кои емигрирале во САД за да се заблагодарат на постоењето на САД. 4 јули ја има истата цел, но тоа повеќе изгледа како државен празник отколку како свет ден. Кога бев дете, имав пријатели кои прашуваа, Дали го славите Денот на благодарноста? И ние велевме, Да, затоа што “Сме Американци и се гордееме со оваа земја и со тоа што таа претставува и со тоа што сторила за нас. И знам дека многу имигранти и деца на имигранти го прославуваат Денот на благодарноста на ист начин“, истакна господинот Давидоф.

XS
SM
MD
LG