Различни типови на артилериско оружје, гранати, рачни фрчали, минофрлачи, ракетни фрлачи „оса“, бесповлечни топови, противпешадиски мини, противокопен електронски наведувач, разни типови бомби, автоматско оружје, муниција, два противавионски лансери земја- воздух “стрела“, зољи, оружје доволно да се опреми баталјон од 650 лица. Со овој арсенал располагала криминалната група што завчера беше разбиена во Бродец во полициската акција Планинска бура.
Ова е најголема заплена на илегално оружје досега, рече министерката за внатрешни работи Гордана Јанкуловска.
- Оружјето како што може да се види има различно потекло. Од пакувањето на оружјето се гледа дека дел е од кинеско, дел е од југословенско производство има парчиња оружје од Русија и од други простори. Сега останува во текот на истрагата и врз основа и на изјавите и врз основа на нашите разузнавачки информации да се утврди периодот кога е внесено оружејто и патот по кој тоа стигнало во тетовско Бродец.
Вооружената група е повеќе од криминална, тврди министерката Јанкуловска, судејќи според прирачниците за обука, оружјето што го користеле и отпорот што го пружиле. Против 17 лица, од кои четворица се во бегство, МВР ќе поднесе кривични пријави. Нема информации каде би можела да биде избеганата група.
- Се разбира дека работиме на откривање на местото каде тие евентуално се кријат, но кривична пријава ќе биде поднесена против сите 17, вклучувајќи ги и четворицата кои се во бегство. Ние денеска го доставивме посебниот извештај, и останува на Обвинителството конечно да ги формулира и да ги процесуира пријавите. Меѓутоа според она што се случи таму овде има простор за многу потешка квалификација.
Запленетото оружје МВР денеска го презентираше во касарната Ѓорче Петров во Скопје.