Цените на мало за една година се повисоки за 15,4 проценти а храната во просек е поскапа за дури 32,4 отсто споредено со октомври минатата година. Некои основни прехрамбени продукти се поскапи за 50 проценти, покажува анализата на Државниот завод за статистика. За само еден месец од септември до окромври годинава инфлацијата е 1,4 проценти а цените на мало се зголемиле во просек за 0,6 проценти
СКОПЈЕ – Инфлацијата продолжува да расте со несмалено темпо исто како и цените на производите и услугите кои граѓаните секојдневно ги купуваат или користат. За само една година, од октомври минатата година до минатиот месец, инфлацијата пораснала за рекордни 19,8 проценти, покажува анализата на Државниот завод за статистика (ДЗС). И цените на мало се исто така драстично зголемени и сдамо за една година е забележан раст во просек од 15,4 проценти но загрижувачки е што цените на основните прехрамбени производи се поскапени за над 30 проценти.
„Индексот на трошоците на животот во октомври 2022 година, во однос на октомври 2021 година, бележи зголемување од 19.8 %, а индексот на цените на мало бележи зголемување од 15.4 %“, стои во извештајот на ДЗС.
Граѓаните се почесто алармираат дека цените на прехрамбените производи, овошјето и зеленчукот, секојдневно се менуваат на рафтовите во продавниците а тоа го потврдува и ДЗС според кој за една година тие се повисоки за 15,4 проценти. Но цените на основните прехрамбени продукти се зголемени далеку повеќе. Најголемо поскапување има на лебот - 47,7 прооценти, на млекото, сирењето и јајцата за 40,7 проценти. Маслото е поскапо за 40,3 проценти, месото за 28.6 проценти, зеленчукот поскапе за 22,4 проценти а овошјето за само една година е поскапо за 15,5 отсто.
„Во октомври, исто така, пораст на индексите на трошоците на животот е забележан и кај другите медицински производи за 4.6 %, другите услуги за опремата за сопствен превоз за 3.7 %, цврстите горива за домаќинствата за 3.4 %, парамедицинските услуги за 1.8 %, гасот за домаќинствата, поправката на аудиовизуелната, фотографската и информатичката опрема, домашните миленици и сродните производи за 1.7 %, обувките, рестораните, кафулињата и слично за 1.6 %, облеката, другите апарати и производи за лична хигиена за 1.4 %, медицинските услуги за 1.3.%, горивата и мазивата за сопствените превозни средства за 1.2 %, игрите, играчките и хобијата за 1.0 %, малите електрични апарати за домаќинствата, производите за домаќинствата - нетрајни за 0.9 %, информатичката опрема за обработка на податоците за 0.8 %“, информират од ДЗС.
Инфлацијата и покачените цени влијаат врз куповната и платежната моќ на граѓаните па се сега синдикалната потрошувачка кошничка изнесува 51.514 денари односно за да може да преживее четиричлено семејство потребни се речиси три минимални плати од по 18 илјади денари.
На ова треба да се додадат и цените на електричната енергија, топлинската енергија и транспортот кои исто така се драстично повисоки од октомври минатата година. Најголемо зголемување на цената има на топлинската енергија – 30 проценти а електричната е поскапена за 20,2 проценти. Транспортот е поскап за 17,7 проценти покажува статистиката на ДЗС.
Намалување на цените има кај неколку производи и сектори.
„Намалување на индексите на трошоците на животот во октомври 2022 година, во споредба со претходниот месец, е забележано кај свежото и разладеното овошје за 3.6 % и маслото и маснотиите за 0.8 %. Во октомври, исто така, намалување на индексот на трошоците на животот е забележан и кај услугите за сместување за 12.4 %, туристичките аранжмани за 10.4 %, теписите и другите подни покривки за 4.5 %, воздухопловниот патнички транспорт за 1.7 %, градините, растенијата и цвеќињата за 1.4 %, резервните делови и приборот за сопствените превозни средства за 1.1 %, моторните возила за 0.7 %“, соопштија од ДЗС.
Останува да се види дали инлацијата до крајот на годината ќе ја премине и границата од 20 проценти или Владата ќе се обиде да ја стабилизира со антикризни мерки или замрзнвање на максималните цени.