Различни анкети покажуваат различни податоци, па дури и во трката за претседател на САД како сегашнава. Иако Хилари Клинтон воглавно води пред ривалот Доналд Трамп, треба да се имаат предвид неколку нешта во врска со истражувањата на јавно мислење:
1. Фокус на големата слика
Спектакуларни анкети може да се најдат на насловните страници, но тоа не значи дека ја отсликуваат реалноста. За вистинска слика потребен е фокус на вкупните анкети - податоци од многу различни анкети го прават заклучокот.
Организациите FiveThirtyEight и RealClearPolitics, прават веродостојни анкети.
2. Анкетните групи се создаваат на различен начин
Многу истражувачки организации се непартиски и користат проверени методи, но некои имаат идеолошки предзнак и се финансирани од партиски групи. Некои истражувачки компании, пак, имаат имиџ дека прават анкети за наслови во печатот. Важно е да се знае разликата.
3. Анкетите користат различна методологија
Традиционално, најпочитуваните истражувања на јавно мислење се спроведуваат преку телефон. Но тоа почнува да се менува. Денес многу од анкетите се прават на Интернет. Тоа не значи дека ваквите не се веродостојни, туку дека треба да бидат земени со доза на скептицизам, затоа што е тешко да се обезбеди репрезентативна слика преку Интернет.
Други фактори се колкав бил анкетниот примерок и дали се земени предвид мислењата на оние кои ќе излезат на избори и гласаат.
4. Важноста на променливите сојузни држави
Националните анкети се добри за да се одреди општиот тренд, но американските претседателски избори не се решаваат со мнозинско гласање. Изборите се решаваат според резултатите во секоја од 50-те сојузни држави. Мнозинството држави гласаат за демократите или републиканците, без разлика кој е кандидат. Посебно важни за победа се сојузните држави кои не секогаш гласаат за демократ или за републиканец. Тоа се т.н. „променливи држави“ кои не некогаш се „црвени“, а некогаш „сини“, како на пример Флорида, Охајо, Ајова, Колорадо, Невада и Њу Хемпшир.
5. Анкетите не ја предвидуваат иднината
Анкетите го покажуваат само моментот. Според нив не може да се претскаже иднината. Како што се приближува 8-ми ноември, нештата може да се променат брзо. Фактори кои влијаат на тоа се: телевизиските дебати, објавување или необјавување на документи – здравствени, даночни и други.