Линкови за пристапност

НБА: Атланта ја совлада Индијана


Перо Антиќ во првата петорка, постигна 16 поени

Атланта хокс, во чии редови настапува македонскиот интернационалец Перо Антиќ, со резултат од 97:87 на домашен терен ја совлада Индијана пејсерс, екипата со најдобар учинок во досегашниот тек на натпреварувањата (28 победи и 7 порази).

Антиќ и овој натпревар го почна во првата петорка и имаше 16 поени и 8 скока за 26 минути, колку што беше во игра. За три поени имаше ефикасност од 50% - 3 од 6 обида. Најпрецизен кај домаќините беше Кајл Корвер со 17 поени. Кај гостите од Индијана, најдобар беше ѕвездата во подем Пол Џорџ со 28 коша и 11 скокови. Во петок, Атланта игра против Хјустон рокетс.

На официјалната страница на НБА, македонскиот интернационалец се најде меѓу 10-те играчи на кои ова им е прва сезона во лигата, а постигнале најголем напредок. НБА наведува дека во последните шест меча, по повредата на првиот центар на Атланта, Ал Хорфорд, Антиќ во просек има 7,7 поени, 5,2 скока и 22 минути на паркетот. За три поени, има шут од 44%, и, како што е цитиран во текстот, се прилагодува на центарската позиција во тимот.
XS
SM
MD
LG