Линкови за пристапност

Саем на универзитети

  • Соња Трајковска

Амбасадата на САД синоќа претстави 19 американски универзитети пред македонски средношколци

Деветнаесет универзитети од САД би сакале во своите редови да имаат студенти од Македонија. На Саемот на универзитети, во организација на Амбасадата на САД, преку брошури тие ги претставија условите и предностите на дипломата со нивниот печат.

За трите часови презентација, повеќе десетици македонски средношколци - идни студенти, преку разговор со студенти - Американци од овие универзитети, се запознаа со начинот на студирање, што се` е потребно да се стане бруцош на некои од најпрестижните светски универзитети, но и со тоа што се вреднува во американскиот образовен систем.

А предизвици, за некои од нив, има многу.

„Фасциниран сум од американскиот систем на образование, на тоа што не мора да се фокусираш на само една област на студирање. Тука е и можноста за запознавање луѓе од различни краишта на светот. Живеењето во кампус ми е голем предизвик, нешто што сум го гледал на филмовите, стекнувањето самостојност“, вели Дарко, којшто годинава е матурант во една скопска гимназија.

„Не мора веднаш да се одлучиш за насока, а и кога ќе одбереш, може истовремено да се земат предмети и во други области. Нема само седнување и учење, туку има пишување есеи, учество во дискусии, дебати, па колоквиуми. Знам дека не е лесно, но е предизвик“, вели Јована, која е трета година средно училиште, но, како што вели, „сон и е да студира во САД“.

„Ми се допаѓа како ги третираат студентите, професорите се достапни и студентите можат да разговаат со нив за најразлични теми. Слушнав дека мислењето на студентот е навистина важно и дека постои култура - студентите да го оценуваат секој предмет. Ми се допаѓа и тоа што не е се фокусирано само на учење, туку дека се организираат и активности како конференции, патувања, волонтерски активности“, ги пренесува своите импресии Ивана. Таа додава дека по презентацијата само и` зајакнала желбата еден ден да биде дипломец на некој од овие универзитети.

Статистиката што ја објави Амбасадата на САД е дека 237 студенти од Македонија минатата година студирале на американските универзитети и дека тие речиси подеднакво избрале некои од државните или приватните – 53% се одлучиле за државните, а 47% ги избрале приватните.

Минатата година, Филип Бујаровски беше единствениот Македонец којшто доби целосна стипендија за да студира на престижниот универзитет Харвард во Бостон. Пред неколку години, за истиот Универзитет се одлучи и Тијана Катушевска, матурантката од скопската гимназија „Јосип Броз Тито“, којашто по апликацијата за студирање на САД доби понуди од Харвард и Колумбија. Овие двајца, во интервјуата за македонските медиуми, им порачаа на своите врзници да не се обесхрабруваат, бидејќи она што се цени на овие универзитети се лидерството, иницијативноста, работата и трудот, а најмалку од се` се важни оценките. И, најважното, како што велат, да тргнат по она што им е - сон.

XS
SM
MD
LG