Гласот на Америка ги интервјуираше Кели и Корниенко кои ќе минат вкупно 340 последователни денови во вселената, но американскиот астронаут со тоа ќе го постави рекордот на најдолга мисија на еден астронаут на НАСА.
Целта на уникатната студија што започна на 27-ми март 2015-та, е да се испита како пролонгираниот престој во вселената влијание врз менталното и физичко здравје на астронаутите, како подготовка за идните мисии на Марс со човечки екипаж. Во неодамнешното интервју за Гласот на Америка, командантот на 46-та експедиција на станицата, изјави:
„Што подолго сте овде, поголеми се шансите да се јават проблеми заради физиолошките промени, како слабеење на коските и мускулите, видот, дури и кардиоваскуларната слика“.
Кели работел на преку 400 научни експерименти, а податоците од изолацијата на човечкото тело ќе се споредат со оние од неговата претходна 6-месечна мисија, но и со психофизичката состојба на неговиот брат-близнак, пензионираниот астронаут, Марк Кели.
НАСА најави и темелна анализа на влијанието на бестежинската состојба и изложеноста на радијација, следење на промените во сончевиот систем, за да се намалат ризиците на идните мисии.
Кели истакна дека му недостасуваат многу работи од Земјата и со нетрпение чека да се врати дома, но воедно изрази благодарност за, како што ја нарече, оваа привилегија. „Од една страна е тешко да се биде овде толку долго, но кога ќе се сетиме на важноста на испитувањата на најразличните технологии, процесот станува полесен“.
За успех на проектите Кели вели дека е важно партнерството на екипажот.
„Постојано следиме вести, и кога ќе погледнеме надолу, имаме чувство дека сме отцепени. Токму тогаш согледуваме дека се случува многу, повеќето е лошо, што е мошне тажно и срамно, бидејќи планетата Земја е прекрасно место, тоа е нашиот дом и ако ние не се грижиме за неа, тогаш кој? Исто како и сите овде во станицата, се потпираме еден на друг“, изјави Кели за Гласот на Америка.
Меѓународната вселенска станица, вредна 100 милијарди долари, орбитира околу Земјата на секои час и половина, можност Кели да ни` испрати неверојатни фотографии од речиси целиот свет, вклучувајќи ја и, Македонија.
Ова е четврта мисија на Скот Кели, со вкупно минати 540 денови во вселената. Рекордот од 438 последователни денови го држи Валери Пољаков на старата руска вселенска станица Мир во 1994-та и 1995-та година.
Американските астронаути Вилијам Шепард и руските космонаути Сергеј Крикалев и Јури Гидзенко беа првиот екипаж на Меѓународната вселенска станица. Оттогаш, во 50-годишната историја на човечки екипаж во вселената, на свои мисии во станицата биле преку 220 астронаути од 17 земји ширум светот.