Линкови за пристапност

Уaпсен поранешен инженер на БП за случајот со нафтено излевање


Обвинет дека намерно уништил докази за тоа колку нафта завршила во Мексиканскиот Залив.

Поранешен инженер на нафтениот гигант Бритиш петролеум (БП) е уапсен под обвинение дека намерно уништил докази во врска со експлозијата на нафтена платформа во 2010-та, во која загинаа 11 лица и што предизвика огромно нафтено излевање во Мексиканскиот Залив.

Американскиот Оддел за правда соопшти дека денес уапсениот 50-годишен Курт Микс од Тексас е обвинет за попречување на истрагата. Микс наводно избришал 300 телефонски текст-пораки за тоа колку нафта се излева во Заливот во време кога БП се обидувала да го запре излевањето.

Микс е првиот обвинет во, како што наведуваат властите, натамошната истрага за одговорните за најтешкото подводно излевање во историјата на САД. Кога конечно беше затворен изворот, во Мексиканскиот Залив веќе истекоа речиси 5 милиони барели нафта.

Доколку биде осуден, Микс би можел да добие до 40 години затвор и парична казна од 500.000 долари.

БП денес соопшти дека соработува со Одделот за правда и другите инстанци кои вршат истрага за излевањето. Компанијата наведува дека има јасна политика што налага чување на податоците и дека презела исцрпни и континуирани напори за таа цел. Па сепак, таа одби директно да коментира на случајот против Микс.

XS
SM
MD
LG