Дел од инаугуративната парада беше и Марио Христовски, студент од Охајо. Христовски, кој е роден во САД, вели дека добил покана да присуствува на инаугурацијата, со помош на конгресменот Стив Шабет.
„Македонците се навистина многу голем и интегрален дел во регионот на конгресменот Стив Шабет, и неколку недели по победата на Трамп тој ми понуди билет за да можам да одам на инаугурацијата“, вели Христовски.
Заедно со билетот, ден пред парадата, Христовски добил и пакет со прецизни информации, за тоа како и каде точно ќе треба да се движи во текот на инаугурацијата.
„Пишуваше кога и каде треба да бидам таму. И уште поважно каква улога треба да имам на самите настани, како и дали ќе можам да се сретнам со некои конгресмени и сенатори во текот на овие денови“, објаснува тој.
Христовски имал цел да разговара со членови на Конгресот, пријатели на Македонија, за да се зацврстат идните односи на Македонија и на САД, а се надева дека во иднина ќе се сретне и со новиот претседател Доналд Трамп.
За парадата имал специјален костум и црвена капа, за како што рече, да наликува на Трамп.