Дури и моќната двопартиска „Суперкомисија“ нема решение како да го намали дефицитот за 1,2 трилиони долари во наредните 10 години.
Комисијата има рок до понеделник навечер да понуди решение, а до среда тој да биде конкретизиран. Политичкиот аналитичар Стјуарт Ротенберг вели дека рокот е поставен со добра причина.
“Мораше да има нешто да ги натера да се договорат. Затоа е утврдена постапката за скратувања низ целата влада, вклучувајќи ги и трошоците за одбрана, што е ужасна алтернатива, а поради која мора да дојдат до договор“, коментира Ротенберг.
„Суперкомисијата“ се чини дека ги има истите проблеми како и целиот Конгрес. Прогресивните демократи се плашат дека таа ќе ги скрати програмите за социјална грижа, што им се важни.
Независниот сенатор Берни Сандерс од Вермонт, пак, е категоричен: „Проклет да сум ако го балансираме буџетот врз грбот на старите, болните, децата и сиромашните. Тоа е погрешно“.
Конзервативните републиканци се плашат дека суперкомисијата ќе ги крене даноците – нешто на кое огнено се противат.
„Заедничката комисија има само една опција - намалување на трошоците и реформа на загарантираните бенефиции“, наведува претседателот на Претставничкиот дом, републиканецот Џон Бејнер.
Некои републиканци индицираат дека би се согласиле на одредени даночни зголемувања, но демократите стравуваат дека намалувањата на трошоците и зголемувањето на даноците би било несразмерно.
Тоа поттикнува некои законодавци да заговараат „голем договор“ – „Суперкомисијата“ да предложи мерка од 4 трилиони долари во скратување на трошоците и зголемување на даноците.
Демократскиот сенатор Марк Ворнер, од Вирџинија, вели:
„Неуспехот не е опција. Целиот свет гледа“.
Само уште два дена. Што потоа – е друга тема.