Линкови за пристапност

Децата можеби најдобро учат преку директно учество. Една мајка од сојузната држава Мериленд го имаше тоа на ум кога основа хуманитарна организација – „Храна на 15-ти“, која им помага на оние во соседството кои имаат помалку од другите.

На 15-ти секој месец, во основното училиште Поинт Ран во Мериленд врие како во кошница. Учениците ја сортираат донираната храна, ја пакуваат и ја доставуваат до постари лица со ниски примања. Џули Розентал ја основала хуманитарната организација пред шест години.

„Сакав да ја научам ќерка ми и другите на важноста да им се помогне на оние кои имаат помалку“, раскажува Розентал.

Ќерка и` Џени Мендл тогаш била во петто одделение. Сега има 15 години и се` уште помага.

„Мислев дека храната доаѓа од фрижидерот, а парите растат на дрво. Не знаев дека во нашата општина има луѓе кои гладуваат, едвај врзуваат крај со крај“, вели Мендл.

Децата во организацијата на 15-ти секој месец доставуваат храна на оние чија пензија не им дозволува голем избор.

„Јас сум на строг буџет. Со оглед на цените во продавниците, помошта е од огромно значење“, објаснува Линда Тестерман, која додава дека насмевката на децата - подеднакво помага.

На почетокот, организацијата оперирала од едно училиште и доставувала 30 пакети помош во храна. Денес вклучува 10 училишта, неколку цркви, а досега има доставено преку 12.000 пакети.

„Тоа е моќта на едното. Луѓето не увидуваат колку е голема – еден пакет повеќе, еден оброк повеќе. Еден човек може да направи разлика“, коментира Розентал. Таа сака да ја развие организацијата ширум Мериленд, и, зошто да не, целиот свет.

XS
SM
MD
LG