Линкови за пристапност

Македонија: Студентите велат „окупацијата“ продолжува

  • Соња Трајковска

Студентскиот пленум соопшти дека средбата со власта била позитивна, но далеку од договор

„Окупацијата“ на факултетите продолжува. Студентскиот пленум, чии претставници вчера беа на средбата со претставниците на Министерството за образование и Универитетото, денеска соопшти дека таа била позитивна, но дека е далеку од договор за нов закон за високо образование.

„Средбата не беше од решавачки карактер. Ние го изнесовме нашето клучно барање, а тоа е интегрално нов текст на Законот за високо образование. За тоа беа изнесени аргументи и средбата заврши со договор да имаме следна средба, односно не беше ништо одлучено“, рече Ивана Туфегџиќ.

Единствено било договорено е во рок од 30 дена да се направи анализа зошто е проблематичен актуелниот Закон.

„Нашето барање за новиот закон е да нема никаква форма на надворешно тестирање од страна на државата, тоа е поткрепено со аргументот дека прво треба да ги разработиме механизмите кои веќе постојат како Одборот за акредитација и евалуација кој очигледно не си ја работел својата работа“, додаде Туфегџиќ.

Студентите се надеваат дека попозитивен резултат можно е да има дури по наредната средба, што би се одржала следната недела. Затоа, како што велат, „окупацијата ќе продолжи се` додека не добијат потврда дека ќе почне да се пишува текст за нов закон за високо образование“.

Вчерашната средба во Ректоратот на Универзитетот „Свети Кирил и Методиј“, на која како дел од владиниот тим присутвуваа министерот за образование Абдилаќим Адеми, заменикот Спиро Ристовски, и вицепремиерот Зоран Ставревски, траеше речиси пет часа. Во соопштението потоа, кусо беше наведено дека е договорено во рок од 30 дена работните групи од МОН, УКИМ и пленумците да изготват анализа на состојбите што ќе биде основа за понатамошно дефинирање на концептот за новиот закон за високо образование.

XS
SM
MD
LG